არმური (ნისლი მთათა ზედა)
არმური
არმური (ნისლი მთათა ზედა)

არმური - ლიტარენა, უფრო კი – ბიბლიოთეკა
Armuri (scotch mist over mountains) - literary Arena from Georgia (country)


Forum started: Sun 9 Nov 2008
 
HomeHome  PortalPortal  CalendarCalendar  GalleryGallery  FAQFAQ  SearchSearch  MemberlistMemberlist  UsergroupsUsergroups  RegisterRegister  Log inLog in  

Share | 
 

 რატი ამაღლობელი – თეონა სირბილაძე

View previous topic View next topic Go down 
AuthorMessage
Admin
Into Armury
Into Armury
avatar

Male
Number of posts : 4185
Registration date : 09.11.08

PostSubject: რატი ამაღლობელი – თეონა სირბილაძე    Fri Apr 08, 2011 1:02 pm



რატი ამაღლობელი: "პოეზიას ბევრი აქვს საერთო ანგელოსებთან"


"გუმბათი" პოეტ რატი ამაღლობელს ესაუბრა და გაარკვია, რომ ერთი უცნაური სურვილი აქვს: ანგელოსების დაბრუნება ქართულ პოეზიაში. "ეს არის ერთი ადამიანის გზა პოეზიაში, ეს არის გზა, ზოგან ვიწრო, ზოგან ფართო, ზოგან გაფუჭებული, ზოგან კარგი...", – ასე აფასებს ის საკუთარ შემოქმედებას.

– რატი, თქვენ როგორ შეაფასებთ, თქვენთვის რა არის პოეზია?

– პოეზია ჰგავს მარილსა და სანელებლებს. აქ ჩვენ კონცენტრირებული ინგრედიენტების სამზარეულო გვაქვს, როცა პოეზიას ვეხებით. ცხოვრებასა და მის აღქმებს ხსენებული პოეტური "სანელებლების" გარეშე, არანაირი გემო არა აქვს, იგი სრულიად უგემურია.

– როცა წერთ, რას სწავლობთ, ან რას ასწავლით სხვას?

– როცა ვწერ, უპირველეს ყოვლისა, ვსწავლობ საკუთარ თავსა და ადამიანებს. თავად ადამიანები კი, ერთად წარმოადგენენ სამყაროს, რადგან სამყარო საკუთარ თავს სწორედ ადამიანებში და ადამიანებიდან ავლენს. შესაბამისად, გამოდის, რომ ვსწავლობ სამყაროს. თუ ეს ჩემი გამოცდილება ვინმეს რამეში წაადგება, ეს უკვე მათი საქმეა.

– როგორ ფიქრობთ, არის თუ არა ეს პასუხისმგებლობა? როგორ იცვლება ის წლების სვლასთან ერთად?

– გადაჭარბებულმა პასუხისმგებლობამ შესაძლოა წერაზეც აგაღებინოს ხელი. რასაკვირველია, ასაკთან, ყოველ დაწერილ სიტყვასთან ერთად, პასუხისმგებლობა იზრდება.

– მესაუბრეთ მუზებზე რატი ამაღლობელის ცხოვრებასა და შემოქმედებაში...

– ძველი ბერძნები ცხრაგვარ მუზას განარჩევდნენ ერთმანეთისგან. ეს მუზები არ იყვნენ ადამიანები. ისინი ნახევრად ღმერთებიც კი იყვნენ – ქალღმერთები, რომლებიც ინსპირირებდნენ არა მხოლოდ ლირიკულ პოეზიას, არამედ – დრამას, ეპოსს, ისტორიას და სხვა... ძველ საბერძნეთში მათი აღქმა იმდენად ცოცხალი იყო, რომ ჰომეროსი თავის ილიადასა და ოდისეას მუზებისადმი თხოვნითა და მუდარით იწყებს ("მუზავ, მიმღერე, მუზავ, მითხარი...") ვფიქრობ, მუზები დღესაც არსებობენ. მათ მხოლოდ დანახვა სჭირდება. ოღონდაც მსგავსი დანახვისა და ურთიერთობის სურვილი მუზებსაც უნდა გააჩნდეთ. სხვაგვარად არაფერი გამოვა.

– როგორც ვიცი, ბავშვობიდანვე გიკითხავდნენ სხვადასხვა პოეტების შედევრებს. საინტერესოა, როგორია რატი ამაღლობელის, როგორც პოეტის, შეფასება მისთვის საყვარელი პოეტისა.

– ჩვენ აქ რომ მნიშვნელოვანი პოეტების შეფასებები დავიწყოთ, არათუ ჟურნალი, წიგნებიც არ გვეყოფა. ჩემთვის ახლობელი პოეტები ყოველთვის გამოირჩეოდნენ სამყაროს იმგვარი აღქმებით, რომლებიც დღემდე ამდიდრებენ ჩვენს ფანტაზიასა და შემოქმედებით უნარს. ასეთია, პირველყოვლისა, გალაკტიონი, ურომლისოდაც წარმოუდგენელია დღევანდელი ქართული ენა. გალაკტიონი რომ არა, ჩვენ გვექნებოდა არც დღევანდელი ესთეტიკური აღქმები და არც ამჟამინდელი ქართული.

– როგორ ფიქრობთ, ნამდვილი პოეტი შეკვეთით შეიძლება წერდეს?

– გააჩნია რა არის შეკვეთა და ვისგან მოდის. ძალიან ბევრი შედევრი, როგორც პოეზიაში, ლიტერატურაში, ასევე მხატვრობასა და მუსიკაში დაკვეთით შეიქმნა. თუნდაც "ვეფხისტყაოსანი" რად ღირს: "მიბრძანეს მათთა საქებრად თქმა ლექსებისა ტკბილისა", შეკვეთა არ უნდა გულისხმობდეს იდეოლოგიურად დასაზღვრულ ტექსტს. თუ შეკვეთა სურვილია, კონკრეტული ავტორისგან მივიღოთ მისი ნიჭისა და შესაძლებლობების ფარდი ტექსტი, მაშინ ასეთი შეკვეთები მხოლოდ მისასალმებელია.

– როგორ მიგაჩნიათ, ლექსისთვის რითმა გარდუვალი აუცილებლობაა? ანუ როგორია თქვენი დამოკიდებულება ვერლიბრის მიმართ?

– მე რითმოვან ლექსს ვანიჭებ უპირატესობას, მაგრამ ლიტერატურის ისტორიას უამრავი შედევრი ახსოვს ვერლიბრის სახით დაწერილი. კარგი ვერლიბრის შექმნა, როგორც ხშირად ჰგონიათ ხოლმე, არ არის იოლი საქმე.

– თანამედროვე ქართველ პოეტებზე რას იტყვით?

– ძალიან ბევრი კარგი თანამედროვე პოეტია, მაგალითისთვის: ზვიად რატიანი, დიანა ანფიმიადი, პაატა შამუგია, გაგა ნახუცრიშვილი, შოთა იათაშვილი, ძალიან ბევრია, ყველას ვერ ჩამოვთვლი. მათ განსხავებული სტილი და განსხვავებული სათქმელი აქვთ, რომელთა გადმოცემასაც არაჩვეულებრივად ახერხებენ საკუთარ შემოქმედებაში.

– ერთგან თქვით, რომ გაქვთ არაჩვეულებრივი სურვილი: "ანგელოსების დაბრუნება ქართულ პოეზიაში". როდის იყვნენ ისინი ჩვენთან და როდის ან რატომ დაგვტოვეს?

– ისინი ქართული პოეზიის დაბადებისთანავე პოულობდნენ ქართული სიტყვის შენობაში საკუთარ ადგილსა და სამყოფელს. ნებისმიერი ენა, ვფიქრობ, ანგელოსების სხეულია, მათი ემანაციაა. ჰოლდერლინის აზრით, ენა მიწას ჰგავს, წიაღს, პოეზია კი, ამ წიაღის გვირგვინს, ყვავილებს წარმოადგენს. როგორც მიწიდან ამოდიან ყვავილები, ისე აღმოცენდება პოეზია ენიდან, ანუ პოეზია ენის ყვავილია. ამიტომაც პოეზიას ბევრი აქვს საერთო ანგელოსებთან. თუ ჩვენ მხოლოდ მომხმარებლის თვალით შევყურებთ ენას, მაშინ იგი სრულიად ცარიელია და დაცლილი მსგავსი არსებებისგან. თუ ენა ჩვენთვის, როგორც ჰაიდეგერი იტყოდა, ყოფიერების სახლია, მასში უამრავ დახვეწილსა და მშვენიერ არსებას აღმოვაჩენთ, რომელთაც ბერძნულად ანგელოსები – მაცნეები ჰქვიათ.

თეონა სირბილაძე

წყარო – http://www.sana.ge/address/news/cat/8/id/23016//"პოეზიას ბევრი აქვს საერთ

Back to top Go down
View user profile http://armuri.4forum.biz
 
რატი ამაღლობელი – თეონა სირბილაძე
View previous topic View next topic Back to top 
Page 1 of 1

Permissions in this forum:You cannot reply to topics in this forum
არმური (ნისლი მთათა ზედა) :: მთქმელი და გამგონებელი :: სიტყვითდუელები-
Jump to: