არმური (ნისლი მთათა ზედა)
არმური
არმური (ნისლი მთათა ზედა)

არმური - ლიტარენა, უფრო კი – ბიბლიოთეკა
Armuri (scotch mist over mountains) - literary Arena from Georgia (country)


Forum started: Sun 9 Nov 2008
 
HomeHome  PortalPortal  CalendarCalendar  GalleryGallery  FAQFAQ  SearchSearch  MemberlistMemberlist  UsergroupsUsergroups  RegisterRegister  Log inLog in  
* თამარ გელოვანისიმღერიდან სიტყვამდე. * მიხო მოსულიშვილიჰელესა (კინორომანი). * თამარ ლომიძეზღვარი (ლექსები).
* ბელა ჩეკურიშვილიშეკითხვად სიზიფეს (ლექსები) * ხათუნა ცხადაძე (მთარგმნელი) უმბერტო ეკო „ფუკოს ქანქარა“
* ლაშა ბუღაძენავიგატორი (პიესა). * ნინო ქაჯაია (მთარგმნელი)უილიმ გოლდინგი - „ბუზთა ბატონი“ (რომანი) * ზაზა თვარაძესიტყვები (რომანი).
* მიხეილ ანთაძესაიდუმლოებით მოცული უ.შ, სინქრონისტულობის პრინციპი. *
* რადიარდ კიპლინგი - აი ასეთი ამბები (თორმეტი და კიდევ ერთი ზღაპარი), მთარგმნელი ანი მოსულიშვილი * ვახტანგ ჯავახაძევახტანგური (ლექსები. რჩეული)
* მიხო მოსულიშვილიდიდი ძუ დათვი (რომანი). * ნინო ნადირაძეVIA SOLIS (ლექსები). * მარიამ ხუცურაულისანათა (ლექსები და ჩანაწერები).
* Zurab Karumidze"Dagny or a Love Feast" (English brushed up and fine-tuned by Amy Spurling).
* ბესიკ ხარანაულიმთავარი გამთამაშებელი. * მიხო მოსულიშვილისულის მდინარე (თორმეტი ნოველა). * ნინო სადღობელაშვილიფრთები და ხელები (ლექსები).
* მამუკა ხერხეულიძეომში, როგორც ომში * ზაალ სამადაშვილი – ავტოპორტრეტი წიგნების ფონზე * ირაკლი ლომოური – ავტონეკროლოგი
* მანანა ანთაძე (მთარგმნელი)ტენესი უილიამსი - Camino Real (პიესა). * ქართული პიესა 2012 (ექვსი პიესა).
* თამრი ფხაკაძე – ბოსტანი კონფლიქტის ზონაში (მოთხრობა). * რიუნოსკე აკუტაგავა – დიალოგი წყვდიადში
* გიორგი კაკაბაძენიკო ფიროსმანი (ბიოგრაფიული რომანი). * მიხო მოსულიშვილი – ვაჟა-ფშაველა (ბიოგრაფიული რომანი).

Share | 
 

 მართლა სძინავს თუ არა პოეზიას?

View previous topic View next topic Go down 
Go to page : Previous  1, 2, 3  Next
AuthorMessage
ვაჟა ხორნაული
Into Armury
Into Armury
avatar

Male
Number of posts : 1349
Location : თბილისი
Job/hobbies : პოეტი
Humor : სანაქებო
Registration date : 09.12.08

PostSubject: Re: მართლა სძინავს თუ არა პოეზიას?   Sat Aug 08, 2009 7:40 am

ბობო wrote:
Exclamation

ივანე ამირხანაშვილსაც და მეც - ორთავეს გვაქვს უფლება, უფრო მეტი მოვითხოვოთ დღევანდელი პოეზიისგან... და არა მგონია, ეს ლანძღვა იყოს.

study

ლომებს სძინავთ,
ვეფხები იშვიათად ჩნდებიან,
სად არ დაინახავ ”ნადირთა მცირეთა.”
Back to top Go down
View user profile http://www.urakparaki.ge/?m=7&WUID=1466
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Mon Aug 10, 2009 3:20 am

ვარ?
Back to top Go down
View user profile http://www.armuri.ge
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Mon Aug 10, 2009 3:30 am

ვერ ვპოსატავ. ვიმედოვნებ, ახლა დაიპოსტება: მიხოსაც ვუთხარი და ბატონმა ვაჟამც იცის, ახალ გაზეთს რეკლმა არ ჭირდება. ვანომ მოიტანა წერილი და და დავბეჭდეთ. არავითარი წინასწარი განზრახვები არ გვაქვს. რა ვქნა, დავიფიცო? არც მე ვეთანხმები ვანოს, მაგრამ არ დამებეჭდა? საპირისპირო აზრს, დასაბუთებუთებულს, დავბეჭდავ
Back to top Go down
View user profile http://www.armuri.ge
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Mon Aug 10, 2009 4:46 am

ვინმეს გაგვახსენდა ბაადურ ბალარჯიშვილი?
Back to top Go down
View user profile http://www.armuri.ge
ვაჟა ხორნაული
Into Armury
Into Armury
avatar

Male
Number of posts : 1349
Location : თბილისი
Job/hobbies : პოეტი
Humor : სანაქებო
Registration date : 09.12.08

PostSubject: Re: მართლა სძინავს თუ არა პოეზიას?   Mon Aug 10, 2009 8:43 am

irakli wrote:
ვინმეს გაგვახსენდა ბაადურ ბალარჯიშვილი?


ასეთია ნიჭიერი და უპრეტნზიო ადამიანების ბედისწერა და საზოგადოების ხასიათი_იგი ხშირად ივიწყებს იმას,რასაც უნდა უფრთხილდებოდეს.
Back to top Go down
View user profile http://www.urakparaki.ge/?m=7&WUID=1466
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 12, 2009 2:26 pm

მოგესალმებით ფორუმის წევრებს!

რადგან ბ-მა მიხომ წაგვაქეზა და წაგვახალისა ფორუმზე ახლადმოსულნი, ამ ლიტერატურულ დისკუსიას რატომ არ ეხმაურებითო, მეც გადავწყვიტე მეთქვა ჩემი აზრი ბ-ნი ვანოს წერილზე. სიმართლე გითხრათ, თავს ვიკავებდი, მერიდებოდა როგორც წერილის ავტორის, ასევე ფორუმის მესვეურთა და წევრების. იმედი მაქვს, კადნიერებად არ ჩამითვლით, არავინ განაწყენდება და არც შეურაცხყოფად მიიღებს ვინმე რაიმეს, რადგან აქ კამათი ლიტერატურულ საკითხებზეა და არა პიროვნული ანგარიშსწორება, ამისგან ყველანი ღმერთმა დაგვიფაროს.
მე, ყველასადმი უდიდესი პატივისცემით გამსჭვალული, ახალწვეულის კრძალვით, მაგრამ ლიტერატურის მოყვარულის სითამამით წარმოგიდგენთ ჩემს პასუხს.


Last edited by Sopio Japaridze on Wed Aug 12, 2009 10:23 pm; edited 1 time in total
Back to top Go down
View user profile
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 12, 2009 3:55 pm

"არა ჰქმნა თავისა შენისაგან მსაჯული”
(განაწყენებული მკითხველის პასუხი ბ-ნ ივანე ამირხანაშვილს,
წერილისათვის "არა ჰქმნა თავისა შენისაგან ლექსი”)

ძვირფასო მკითხველო, წერილს, რომელსაც ვეხმაურები, "დუმილის” მისტერიით იწყებს ავტორი: "არსებობს დუმილი, რომელიც ხმაურზე მეტია და არსებობს ხმაური, რომელიც დუმილზე მეტი არ არის”, - გვიმხელს ბ-ნი ივანე. დუმილთან დაკავშირებით ისიც თქმულა "დუმილი ოქროა რჩეულიო”... ზოგჯერ კი დუმილი დანაშაულიცაა... სწორედ ამ უკანასკნელად რომ არ გვექცეს "რჩეული დუმილი”, ჩვენ მის დარღვევას ვირჩევთ, ოღონდ არა ყოველთვის, ამჯერად...
არ დავმალავ, სადისკუსიოდ წარმოდგენილი ეს "რჩეული” წერილი 'ლიტერატურული გაზეთის” მე-5 ნომრის ფურცლებზე ნამდვილად არ წამიკითხავს, მას ლიტერატურულ ფორუმ "არმურზე” გავეცანი და ვერ ვიცრუებ, რომ იქ რაიმე საგულისხმოს წავაწყდი ან ქართული პოეზიისათვის, გნებავთ, ზოგადკულტუროლოგიური თვალსაზრისით. მაგრამ, ამ შემთხვევაში, ჩემი ამპლუა კრიტიკოსობა არ არის, მე მკითხველის პოზიციის გამოხატვა მსურს მხოლოდ. მკითხველისა, რომელიც ცდილობს მიაყურადოს თანამედროვე ქართული მწერლობის მაჯისცემას.
ვიდრე ჩემს სათქმელს ვიტყოდე, მინდა მარიამ წიკლაურს დიდი მადლობა ვუთხრა ჩვეული პრინციპულობის, გულწრფელობისა და ქართული მწერლობის ვეშაგობისთვის, ღირსეული ქალობისთვის. სხვათაშორის, ერთი დიდი დასტური იმისა, რომ ქართულ პოეზიას არ სძინავს, ამ შესანიშნავი პოეტის მრავალფეროვანი შემოქმედებაცაა. ყველაზე ნაკლებად იქნებ, სწორედ, მას უნდა სტკენოდა და სწყენოდა ბ-ნი ვანოს ეს წერილი, რადგან იქ გამოთქმული არც ერთი სიტყვა მარიამის შემოქმედებით "მღვიძარებას” არ ეხება; მაგრამ, ღირსება, კეთილსინდისიერება და მოქალაქეობრივი პასუხისმგებლობა ის ფასეულობებია, წინ რომ ვერ აღუდგები და "დუმილის” უფლებასაც რომ არ მოგცემს. თანაც რა ვუყოთ მის თაობისათ თუ მასზე უფროს-უმცროსთ, რომელთაც, ხშირად, არც ქომაგი ჰყავთ და როგორც ჩანს, არც – მკითხველი... ვინმემ ხომ უნდა ითაოს მათზე ზრუნვა, მათი წახალისება, მათი ნამუშაკევის გაქვეყნება?!. თუკი ამგვარ გზამკვლევად, კეთილი ფერიასავით, თავიანთი მსგავსი მოევლინებათ, წრფელად იწუხებს მათზე და მტკიცე დარაჯად დაუდგება თითოეულს, ეს ხომ კეთილი ნაყოფის საწინდარია მხოლოდ.
"ბოლო ათი-თხუთმეტი წელიწადი კლასიკური კრიზისის პერიოდია მთელი თავისი ჯიუტი ძიებებითა და დამარცხებებით”, წერს ბ-ნი ივანე. თუკი ავტორი თავადვე აღნიშნავს, რომ ბოლო წლების მანძილზე "ჯიუტი ძიება” მიმდინარეობდა, იქნებ იმითაც უფრო ღრმად დაინტერესებულიყო – მოჰყვა თუ არა ამ "ჯიუტ ძიებას” ან, თუნდაც, "თამამ დამარცხებას” შედეგი?! იქნებ ამ მარცხებმა წარმოშვეს "შემოქმედების შემქმნელი ის პიროვნება”, რომელსაც ასე "დაბეჯითებით” ეძებს წერილის ავტორი. მაგრამ იქმნება განცდა, რომ ბ-ნი ლიტერატორი ოდნავადაც არ გარჯილა ამგვარი შემოქმედის აღმოსაჩენად თუ წარმოსაჩენად (შესაძლოა, სკეპტიციზმმა მას ძლიერ დარია ხელი). ნაცარს თუკი კარგად გაჩხრეკ, გაღვივებულ ნაკვერჩხალს იქ უხშირესად აღმოაჩენ, ამისთვის მცირე ძალისხმევაც საკმარისია.


Last edited by Sopio Japaridze on Sat Aug 15, 2009 10:17 am; edited 5 times in total
Back to top Go down
View user profile
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 12, 2009 4:01 pm

გაგრძელება

"ლიტერატურა ჩაიკარგა არითმიული, ნერვული დროის ნამსხვრევებშიო” – ბრძანებს კრიტიკოსი. აგაშენათ ღმერთმა, ჩემო ბატონო! თავად ღაღადებთ ჭეშმარიტებას და იმ მიზეზებსაც პასუხობთ, რამაც საერთოდ ამ წერილის საწერად კალამი შეგამართინათ. გამოდის, რომ ქართულ პროზას და პოეზიას კი არა აქვს კრიზისი, ან ჭეშმარიტი შემოქმედნი კი არ გვყავს სანთლით საძებნელი... პრობლემა სულ სხვაგან, სამყაროულ კრიზისში ყოფილა საძიებელი. ჩვენ კი მხოლოდ "ნერვული დროის ნამსხვრევებში” ჩაკარგული ეროვნული შემოქმედება გადასარჩენი გვაქვს და არა აღმოსაჩენი. ამ ნამსხვრევებით დასახიჩრებული, მაგრამ ჯიუტად ფეხზე მდგომი ქართველი პოეტები და მწერლები გვყავს სამშვიდობოს გასაყვანი, რომ ამით, საკუთარ გათანგულ სულებს ვუწამლოთ და ვუსაშველოთ. ეს კი ძალზე ფაქიზი და დელიკატური საკითხია (იქნებ, ამიტომაც უვლით მას გვერდს ეროვნული კრიტიკოს-ლიტერატორები?! ვინ იცის...), ამისთვის საჭიროა მეტად გტკიოდეს გული და გსურდეს რაიმე სასიკეთოს დანახვა. განსახილველად წარმოდგენილი ნაშრომით კი მათთვის ხელის გაწვდა, ვეჭვობ, გაჭირდება. პირიქითაც შეიძლება მოხდეს: "ნერვული დროის ნამსხვრევებს” ვაებით გამოღწეული მწერლები და პოეტები, თქვენს მიერ ლექსის "მკეთებლებად” მონათლულნი და "ეგოისტურ ფანტომებად” დანაწევრებულნი, შესაძლოა, ისე გადავისროლოთ გულგატეხილობის სამანს მიღმა, რომ შემდგომ, იქიდან მოსაბრუნავი აღარც კი მოინახოს.
სწორედ ამიტომ, ვფიქრობ, ძალზე უადგილო და უსაფუძვლოც კი იყო ამგვარი შინაარსის წერილის ლიტერატურული გაზეთის ფურცლებზე მოხვედრა. მასში, ავტორი, იმდენად ბანალურ ჭეშმარიტებებზე დიდაქტიკურადაც კი გვესაუბრება, რომ მკითხველი გაოცებული რჩები. მაგალითისთვის: "მიბაძვით შეიძლება გენიოსს დაემსგავსო, მიბაძვით შეიძლება გენიალური ლექსი "გააკეთო”. მაგრამ ეს აქცია თუთიყუშის ეფექტზე შორს არ წავა...” "პოეზია რა არსებობს პიროვნების გარეშე..” "პიროვნება ქმნის შემოქმედებას და არა შემოქმედება – პიროვნებას...” "პოეზიის ბედს ჯგუფები და დეკლარაციები კი არა, პიროვნებები წყვეტენ...” ამგვარი შეგონებები მრავლადაა და ცოტა სასაცილოდაც გამოიყურება, თუკი ავტორი, ამ საკითხებზე შემოქმედთ, პოეზიის მსახურთ ესაუბრება და არა მართლაც ღრმა ძილით მოცულ ლექსის "მკეთებლებსა” და "თავიანთ სიცარიელეში არსებულ თვითკმარ მოცემულობებს”...
მაგრამ, ამ შეგონებათა მიღმა, ბ-ნი ივანე მისეულ გამოსავალსაც გვთავაზობს – ქართულ ლექსს "საკუთარი ძირებისკენ, დასავლეთისკენ” მიუთითებს: "დასავლური გზა არის პირდაპირი პერსპექტივა იმ ადგილისკენ, სადაც შეგიძლია შენი თავი აღმოაჩინო, მიაგნო ახალ ხედვას, იპოვო ახალი საშუალებები, განაახლო ენა, ააგო პოეტური მეტყველების ახალი სისტემა”. (ადრევე ეხარებინა ბ-ნ ვანოს ამ ოქროს საბადოს არსებობა ქართველი პოეტებისთვის, იქნებ მათაც დროზე აეღოთ გეზი ამ მიმართულებით და მისი ყურის საამო ლექსებიც შეექმნათ. ან იქნებ დასავლეთს არავითარი კრიზისი არა აქვს ამ სფეროში და მათი შემოქმედნი მშვიდად, გულდადინჯებით ეზიდებიან მადანს ამ უძირო ჭაბურღილიდან?!)
თუკი ეს წერილი ამ მოწოდებისთვის შეიქმნა, მე, როგორც ერთი რიგითი მკითხველი, შვებით თუ არა, გაჭირვებით მაინც ამოვისუნთქავ და ჩავთვლი, რომ მიზანმა გაამართლა საშუალება, ავტორმა შეასრულა დაკისრებული მისია,


Last edited by Sopio Japaridze on Thu Aug 13, 2009 12:54 pm; edited 2 times in total
Back to top Go down
View user profile
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 12, 2009 4:04 pm

გაგრძელება

ან შეიძლება ვალიც მოიხადა ვინმეს წინაშე, მაგრამ ამასთანავე დავიმედდები, რომ არც ისეთი მქისე აზრი ჰქონია მას ქართველ პოეტ-მწერლებზე, როგორადაც წარმოგვიდგინა.
აბა სხვას რას უნდა ნიშნავდეს ასე აშკარა თითის გაშვერა კონკრეტული მიმართულებით?! წერილის ავტორი ერთგან ხომ თავადვე შეგვახსენებს "პიროვნება ქმნის შემოქმედებასო”, ამის გათვალისწინებით, სრულიად წარმოუდგენელია ინდივიდს, საკუთარი ხმისა თუ მსოფლხედვის მქონე ადამიანს მაშრიყ-მაღრიბზე უთითო, მზერის რაკურსი ხომ თავად შემოქმედმა უნდა განსაზღვროს.
ამ უნიათო წერილის "შექმნისა” თუ "გაკეთების” კიდევ ერთ მიზეზად, მე, როგორც მკითხველს, იმ დანაშაულის შეგრძნება მიმაჩნია, რომლითაც უცილობლად უნდა იყოს მოცული თითოეული ქართველი კრიტიკოსი თუ ლიტ. მცოდნე. რატომ? საქმე ის გახლავთ, რომ შეუძლებელია ისინი გუმანით, შინაგანი ლიტერატურული ალღოთი მაინც არ გრძნობდნენ იმას, რომ ჩვენს დღევანდელობაშიც არსებობს საქართველოში ჭეშმარიტი, ღირებული შემოქმედება და ის შემოქმედნი, რომელნიც ახერხებენ ახალი სიტყვის თქმას; მაგრამ კრიტიკა მათ მიმართ, რატომღაც დაუნდობლად ბრმა და ყრუა. იქნებ, სწორედ, კრიტიკოსებს და ნამდვილი შემოქმედების შემფასებელ-დამფასებელთ ჩაეძინათ ჩვენს ქვეყანაში და ამიტომაც ჰგონიათ: ის, რამაც მათი თვალთახედვის მიღმა ჩაიარა, არც არსებობსო!.. ვგონებ, ასეა...
სხვათა შორის, ახლა გამახსენდა თქვენს მიერ არაერთგზის მოხმობილი დიდი გალაკტიონი, რომელიც თითოეული ქმედებით ამტკიცებდა საკუთარ სიდიდეს და ეს მხოლოდ პოეტურ ძალმოსილებას არ გულისხმობს. ადამიანის სიმაღლე ხომ პირველყოვლისა, მის პიროვნულ, ზნეობრივ სიდიადეშია?! ამიტომაც მომაგონდა სწორედ ახლა გალაკტიონის პიროვნება. ყველა კარგად უწყის, როგორ წააქეზა და გაამხნევა მან უყურადღებობითა და უსულგულობით დაღდასმული "სასწაული" პოეტი ნიკო სამადაშვილი – ბუღალტრის მანტიით შესუდრული და ისევე დაუნდობლად დაკორტნილი, როგორც თავად გალაკტიონი:
"დავრწმუნდი მე თქვენს სიძლიერეში;
მომავლისაკენ! წინ! იერიში!”
ვფიქრობ, გალაკტიონ ტაბიძის მიდგომა ნიჭიერებისადმი სამაგალითო უნდა იყოს შემოქმედების შემფასებელთათვის, თანამედროვე ლიტერატურის კრიტიკოსთათვის და არა კირკიტოსანთათვის. ვინ იცის, იქნებ ეს საუკუნე ორსულადაც კია და ვადროვოთ, ბატონო, რომ უჩვეულო "გულშემატკივრობით” უდროოდ არ მოვწყვიტოთ საშვილოსნო წელი. სხვათაშორის, სულ ახლახანს, არაჩვეულებრივი შემოქმედის, ნინო სადღობელაშვილის სწორედ ამ სახელწოდების რომანი - "ორსული” გამოჩნდა წიგნის მაღაზიებში. იმედს ვიტოვებთ, არ მოუხუჭავთ თვალს ახალგაზრდა მწერლის პირველ რომანს, იქნებ მაშინ მაინც "წაღმა იფიქროთ სოფლის უკუღმა ტრიალი”...
ამიტომ, ძალიან გთხოვთ ბ-ნო ვანო, რომ ჩვენს ღირსეულ პოეტ-მწერალთა გვერდით, ნურც ჩვენ, მათ მკითხველებს მოგვნათლავთ "სუროგატის” მხმეველ-მომნელებლებად. პირადად მე არ ვთვლი თავს უგემოვნო მკითხველად და ვერც ჩემს ირგვლივ მყოფთა შესახებ გავიზიარებ ამგვარ შეხედულებას. სუროგატი, რა


Last edited by Sopio Japaridze on Sat Aug 15, 2009 11:14 am; edited 6 times in total
Back to top Go down
View user profile
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 12, 2009 4:09 pm

გაგრძელება

თქმა უნდა, არსებობს, ამის გარეშე არ ყოფილა არც ერთი, თუნდაც გენიოსებით აღბეჭდილი საუკუნე. კვლავაც მომიწევს თქვენი სიტყვების ციტაცია: "სნობიზმი აკეთებს თავის საქმეს: ჩვენ ვაღიარებთ პოეტებს იმით, რითაც სხვებს ჰგვანან და არა იმით, რითაც არიან”. თუკი თქვენ სნობიზმად მიგაჩნიათ "სხვისი მსგავსი” პოეტების აღიარება, მაშინ ნებით რატომ დგახართ (ან დგებით) მათ რიგებში? - "ჩვენ ვაღიარებთო”, ბრძანებთ. მე არაფერს ვაღიარებ ჩემდა თავად და არც ამ სიმრავლეში მოვიაზრებ თავს. თუკი თქვენ მართლაც სხვისი მსგავსი პოეტების მაღიარებლებში რაცხთ საკუთარ პერსონას, მაშინ გამოდის, რომ სუროგატის მკითხველიც და დამფასებელიც თავადვე ყოფილხართ, წარმოდგენილი წერილი კი საკუთარი თავისა და თქვენივე არასწორი ლიტერატურული მიდრეკილებების კრიტიკისთვის მიგიძღვნიათ?!
მე კი "მბაძველთა” კითხვით "პირის გემოს” ნამდვილად ვერ წავიხდენ... მაშინ, როდესაც ჩვენს რეალობაში, დიახ, დიახ, არ ჩაგესმათ – რეალობაში და არა სიზმრად, არსებობენ – ბესიკ ხარანაული, ბათუ დანელია, ლაშა გახარია, ტარიელ ხარხელაური, მარიამ წიკლაური, დიმიტრი წიკლაური, ნინო სადღობელაშვილი და ის არაჩვეულებრივი პოეტები, რომლებიც მარიამ წიკლაურმა უხვად ჩამოასახელა თავის საპასუხო წერილში. აი, აქ არის, ბ-ნო ვანო, თქვენს მიერ გულდაგულ ნაძიები და ვერ მიკვლეული მღვიძარი პოეტების `ახალი სიტყვები, ახალი გზები, ახალი აზრები”. ისინი "ყოფიერებასაც აღიარებენ” და მათი "სალექსო ენა” სწორედ პოეზიას ეკუთვნის და სხვას არაფერს... და კიდევ... ხალხს... ვისთვისაც საერთოდ იქმნება ყოველივე ამ ცისქვეშეთში და ვის შეფხიზლებასაც ემსახურება თითოეული სტრიქონი, რომ გავიგოთ "ცისა მეტი ვართ, თუ მიწისა?!” (მარიამ წიკლაური).
მცირე ხნის წინ, საქართველოს რადიოში, ერთ-ერთი გადაცემა ახალგაზრდა პოეტებს დაეთმო. "ახალგაზრდა” ძალზე პირობითი სიტყვაა, რადგან მათ შორის, ზოგიერთი უკვე 50 წელს მიღწეულიც კია, თავისი მდიდარი ცხოვრებისეული გამოცდილებითა და ხვავრიელი შემოქმედებით. (პოეტისთვის, მოგეხსენებათ, ეს სიმწიფის ხანაა). სხვა საკითხია როგორ მიაღწევინა ქართულმა კრიტიკამ მათ ამ ასაკამდე, უშუამდგომლა თუ არა მკითხველთან, ან თავად მაინც თუ გაიზიარა მათი საფიქრალ-საწუხარი?!. რადიო გადაცემაზე მოგახსენებდით... მას ასე ერქვა - "ქართული პოეზიის შუქ-ჩრდილები – მუზები მაინც არ დუმან”. დიახ, კრიტიკოსთა უსულგულობის ხანაში, პოეტები თავადვე მსჯელობენ ქართული პოეზიის ჭირ-ვარამზე, მაგრამ პროგრამის უმთავრესი მიზანი შემოქმედთა წარმოჩენა და მსმენელ-მკითხველამდე მათი ხმის მიწვდენა იყო. ამ შემთხვევაში, მიზანმა მართლაც გაამართლა საშუალება. ღია ეთერში არ წყდებოდა სატელეფონო ჩართვა. მადლიერებასთან ერთად, მსმენელის განცვიფრებაც უსაზღვრო იყო, რადგან ახალი პოეტური სიტყვის აღმომჩენებად იქცნენ. როგორც ჩანს, ბ-ნი ვანო ამირხანაშვილის დარად, ისინიც ფიქრობდნენ, რომ ბოლო 15-20 წელი სტაგნაციის ხანა იყო ქართულ პოეტურ სივრცეში, გადაცემის ერთ საათიანმა ქრონომეტრაჟმა კი ეს ილუზია სრულიად გააქარწყლა. პროგრამაში, არა მხოლოდ წვეულთა, მთას გარჩენილ მათ თანამოკალმეთა ლექსებიც ხმიანებდა, რაც სტუმრად მყოფი პოეტების დიდბუნებოვნებაზე მეტყველებს უთუოდ.
მე თუ მკითხავთ, ჩვენს თანამედროვე კალმოსნებს, შემოქმედებასთან ერთად ის დიდი ნიჭიც უნდა დავუმადლოთ, რასაც ერთურთის გატანა და მხარში დგომა ჰქვია. ასე მგონია, ისინი დღემდე ერთმანეთით არიან, ერთმანეთის სულის საყრდენებად ქცეულან და ასე ახერხებენ დაუძვრნენ, გამოსცდნენ ულმობელ დროსა თუ ბედის უკუღმართობას. მე თავად ვარ ამგვარი ამაღელვებელი დამოკიდებულებების მოწმე და მოზიარე. დასტურად, შემიძლია ერთი სახიერი მაგალითიც მოვიხმო. ივ. ჯავახიშვილის სახელობის თბილისის სახელმწიფო უნივერსიტეტში ახლაც მოქმედებს "ახალგაზრდა ლიტერატორთა წრე”, რომლის ხელმძღვანელი ქეთევან შენგელია, დამწყებ პოეტებთან ერთად, მოუღალავად ცდილობს თანამედროვე შემოქმედთა წარმოჩენასაც. ეს ხომ თანამოძმისა თუ თანამოკალმისადმი ქრისტესმიერი სიყვარულის ჭეშმარიტი გამოვლინებაა...
ასე რომ ბ-ნო ვანო, თუკი შემოქმედთათვის ხელის წაშველებას ან თუნდაც ხეირიანი რჩევის მიცემას ვერ შეძლებთ, დაბრკოლებად მაინც ნუ ექცევით მათ; თუკი ვერ მოიძევთ საკმარის სიყვარულს, ილიასეული სარკის მიშველებით საკუთარ თავს რომ აღმოაჩენინებს მავანს, თუკი არ გეყოფათ გარჯა და ძალისხმევა საქმის კეთილსინდისიერად წარსამართად, მაშინ ნურც საორჭოფო მიზნის გასამართლებლად გამოიყენებთ ყოველგვარ საშუალებას, რამაც, საბოლოოდ, შესაძლოა, შეუქცევადი პროცესებიც კი გამოიწვიოს, თქვენ კი სინდისის მარადიული ქენჯნით დაგდაღოთ...
...და ვიდრე "მთის ჩიტი მთას შაკვდომია", ბარისა კი უსულგულობით გულგასენილი ხელში ჩაგვკვდომია, "არა ჰქმნათ თავისა თქვენისაგან მსაჯული”, არამედ - წრფელი მოჭირნახულე და მსახური...

დასასრული
Back to top Go down
View user profile
bao
Into Armury
Into Armury
avatar

Female
Number of posts : 391
Age : 57
Registration date : 11.12.08

PostSubject: Re: მართლა სძინავს თუ არა პოეზიას?   Mon Aug 17, 2009 11:56 am

ქალბატონ სოფო ჯაფარიძეს დიდი , დიდი მადლობა!


ბატონო ირაკლი, ბაადურ ბალარჯიშვილის გარდა კიდევ სხვებიც "ვერ გაგვახსენდა", ერთი უბრალო მიზეზის გამო: საბედნიეროდ ბევრი კარგი და ნიჭიერი შემოქმედი გვყავს ყველასი რომ არიან, და არა მარტო პირადი ნაცნობ-მეგობრობის ხათრით გასახსენებლები, მაგრამ ყველას ხომ ვერ ჩამოწერ? და ამიტომაც ვთქვი ეგ ცოტა ეშმაკური სიტყვებიც "მარტო ჩემი უახლოესი ხალხიდან"-მეთქი, ეი. ამით ისიც მივანიშნე, რომ რამდენი არ არის ჩემი ახლობელი და იქაც ხომ ძალიან ბევრი იქნება-მეთქი და დამეფიცება, რომ ჩემი ახლობლებიდანაც ყველა არც დამიწერია... ანუ პრობლემა არა ისაა, "რომ არ ვახსენდებით და არც ჩვენ გაგვახსენდებიან", არამედ ის, რომ ამ ყველა არსებულს, რომელიც ბევრია, ცნობა, წაკითხვა, შესწავლა და ადგილის მიჩენა უნდა და არა ხელის აქნევა...

აქ დაუწერიათ, რომ მე ეს წერილი ტრაგედიად აღვიქვი. კი, არ ვმალავ, ეს ტრაგედიაა! უბრალოდ ჩვენ ან ვხვდებით ამას ან ვერა!

ყველას დიდი მადლობა, ვინც დაგვეთანხმა ან შეგვეწინააღმდეგა! გულწრფელი მადლობა, რადგან, ორივე შემთხვევაში,მათ ფიქრი და აზრი პოეზიას დაუთმეს!
Back to top Go down
View user profile
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 19, 2009 1:53 am

[quote="bao"]ქალბატონ სოფო ჯაფარიძეს დიდი , დიდი მადლობა!


არავისთვის ამიქნევია ხელი და არც მხოლოდ ნაცნობობით ვბეჭდავ. ბევრი სრულიად უცნობი (ჩემთვის) ავტორი დაიბეჭდა უკვე ამ გაზეთში. და ბევრ ნაცნობს უარიც ეთქვა, ნიჭის უკმარისობის გამო
Back to top Go down
View user profile http://www.armuri.ge
bao
Into Armury
Into Armury
avatar

Female
Number of posts : 391
Age : 57
Registration date : 11.12.08

PostSubject: Re: მართლა სძინავს თუ არა პოეზიას?   Wed Aug 19, 2009 11:22 am

ბატონო ირაკლი, უპირველესად გილოცავთ ფერისცვალების დრესასწაულს. სიხარულს და წარმატებებს გისურვებთ და მოკრძალებითც ვიკითხავ, სად ამოიკითხეთ რომ ვინმემ და მათ შორის მეც, დაგაბრალათ ან თქვენ ან თქვენს გაზეთს, რომ "ხელი აუქნიეთ ვინმეს"? "ხელის აქნევის" პოზიცია იკითხება ამირხანაშვილის წერილში და აქ თქვენ გაზეთზე არ არის საუბარი!

ძალიან უხერხულად ვიგრძნობ თავს, თუ ასე დაიძაბება ჩვენს შორის ჯერ კიდევ საერთოდ არარსებული და ჩამოუყალიბებელი ურთიერთობა და ცოტა არ იყოს თქვენგან "გაფრთხილებადაც" ჟღერს, არ მოგვეკაროთო Shocked
მე კი , როგორც ჯიუტი ხევსური, თანამშრომლბასაც ვაპირებდი თქვენს გაზეთთან Very Happy

სოფო ჯაფარიძეს მხოლოდ იმიტომ გადავუხადე მადლობა, რომ გაისარჯა და ამხელა და ასეთი კარგი წერილი დადო აქ, ამ საკითხზე. ვფიქრობ ამ მადლობით არაფერი დამიშავებია და მით უფრო, არაფერი დამიბრალებია გაზეთისათვის.

ისე კი, ნამდვილად ვრწმუნდები, რომ "დუმილი ოქროა" Wink
Back to top Go down
View user profile
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 19, 2009 12:54 pm

ღმერთმა დამიფაროს, ვინმეს ვაფრთხილებდე. პირიქით, რაც მეტი ავტორი მოიტანს მასალას, მეტი არჩევანი გვექნება. ახლა. გაგიმხელთ, რომ პოეზიში საქმე უკეთ გვაქვს, ვიდრე - პროზაში. პროზაული ნაწარმოებები უფრო გვიჭირს. ასე რომ, ვანო არ გამოდგა მართალი, ამჟამად პროზას უფრო სძინვს...
Back to top Go down
View user profile http://www.armuri.ge
bao
Into Armury
Into Armury
avatar

Female
Number of posts : 391
Age : 57
Registration date : 11.12.08

PostSubject: Re: მართლა სძინავს თუ არა პოეზიას?   Wed Aug 19, 2009 1:35 pm

Very Happy

მე კი ლექსები უნდა შემომეთავაზებინა Crying or Very sad

"რავა ყველაფერი დასწრებაზეა ამ ქალაქში" Very Happy

ბოლო ვინ არის? Rolling Eyes
Back to top Go down
View user profile
თეკლე
Way at Armury
Way at Armury
avatar

Female
Number of posts : 41
Age : 37
Registration date : 17.12.08

PostSubject: Re: მართლა სძინავს თუ არა პოეზიას?   Wed Aug 19, 2009 3:02 pm

ჩამიყოლია საინტერესო მსჯელობამ. კარგი იქნებოდა წერილის ავტორიც შემოსულიყო და თავადვე გაეცა პასუხი აქ დასმული შეკითხვებისთვის. ბატონი ვანოს წერილში გულისტკივილი დავიჭირე და რატომღაც დამრჩა აზრი, რომ მას ბევრად მეტის თქმა უნდოდა ვიდრე გადმოგვცა. არ მგონია დიდი მნიშვნელობა ჰქონდეს იმის თქმას, იყო თუ არა ბატონი ვანოს მოსაზრება სწორი, რადგან ამ ორივე შემთხვევაში ნათლად ჩანს გულისტკივილი ლიტერატურულ პროცესზე. ბატონი ვანო წუხს იმაზე, რომ “სუროგატი “ ავტორები მივიღეთ, მარიამი წერს: 2005 წელს შეიქმნა გასაოცარი ნაწარმოები, ნამდვილი ახალი სიტყვა პოეზიაში "ორი ფურცელი ცისა და მიწის"(ბ.ხარანაული) და ეს წიგნი მაღაზიაშიც კი ზედმეტ ბარგად დევს ანუ მგონი უკვე არც დევს.: და ეს სიმართლეა. ნახსენები იყო ბატონი გივი ალხაზიშვილიც, რომელმაც ჩემი აზრით საკმაოდ დიდი როლი შეასრულა ლიტერატურული პროცესის პროგრესისათვის. თუნდაც იმიტომ, რომ ბევრ ახალგაზრდა ნიჭიერ ავტორს დაეხმარა გაეკვალათ ლიტერატურული გზა. ნებისმიერ შემთხვევაში ეს საერთო პრობლემაა და დარწმუნებული ვარ ორივეს უნდათ შეიმნას ისეთი გარემო, სადაც სუროგატებს კი არა ნამდვილ მწერლებს და პოეტებს მივიღებთ. თუმცა არავინ წერს იმაზე ეს როგორ და რანაირად უნდა მოხდეს. და თუ პოეზიას სძინავს, (არ ვიზიარებ, მაგრამ მაინც) იქნებ შეიძლება უბრალოდ გამოვაღვიძოთ.
"ლექსს კი აღარ წერენ, არამედ აკეთებენ, მეტიც, აწყობენ – ტრადიციონალისტებიც და ფორმალისტებიც, რეალისტებიც და ირრეალისტებიც, აბსტრაქციონისტებიც და კონკრეტისტებიც".- წერს ბატონი ვანო და
მიუხედავად იმისა რომ საოცრად დიდ პროტესტს იწვევს ეს სიტყვები ჩემს ლიტერატურულ მე-ში, გარკვეულწილად ეს სიმართლეს შეესაბამება და სამწუხარო რეალობა უნდა ვაღიარო. მასიური ტენდენცია “სუროგატებისა” (დამსგავსებული ავტორებისა) მოიტანა ამ ეპოქამ. ლექსების ეგრეთწოდებული “აწყობაც” ფაქტიურად ჩვევად იქცა. თუმცა იმასაც დიდი მნიშვნელობა აქვს ვინ როგორ აკეთებს ამას.მეორე საკითხია ფორმალისტური ძიებები- ყოფითი ავიაკატასტროფა პოეზიაში, რაც სავსებით ბუნებრივია და კომპიუტერიზირებულ თაობას ალბათ კიდეც მოგვეტევება განსხვავებული შეგრძნებები, რომლების ზოგჯერ შესაძლებელია ძალიან შორს იყოს ფესვებისაგან.
რაღა თქმა უნდა გვყავს ავტორები, რომლებიც ამ მეტად რთულ ეპოქაში ნამდვილ პოეზიას ქმნიან. ჩამოთვლას არ დავიწყებ რადგან მსჯელობა იმაზე ვინ როგორ და რანაირად ქმნის ჭეშმარიტ პოეზიას შორს წაგვიყვანს. თუმცა ჩვენს-ჩვენს გულებში თუ ჩავიხედავთ და ცოტა თვალსაწიერსაც გავიფართოვებთ აუცილებლად დავინახავთ რომ ბევრი ჭეშმარიტი პოეტის შემოქმედება დღეს აქტუალური არ არის. ეპოქა რომელშიც ვცხოვრობთ კომერციულ გათვლებზეა ორიენტირებული. წიგნი ძირითადად პროდუქციაა და ამ პროდუქციას იმისათვის რომ საბაზრო ღირებულება ჰქონდეს აუცილებლად სჭირდება კარგი შეფუთვა. კარგი შეფუთვა კი ყველას არ შეუძლია. შეფუთვასა და ბაზარს რომ თავი დავანებოთ ქვეყანა სადაც ორიოდ ლიტერატურული კონკურსი თუ ტარდება და წიგნის ფესტივალი უფრო ბაზრობას წააგავს, ფიზიკურად ვერ შეძლებს მსოფლიო ბაზარზე გაიტანოს პროდუქცია. და რა კეთდება დღეს ლიტერატურისთვის?!

ბევრი რამ არის გულსატკენი, უამრავი ინტრიგის საბუდარად ქცეული "ლიტერატურა" (პირობითად) კიდევ ბევრჯერ გაგვაკვირვებს. თუმცა ნებისმიერ შემთხვევაში ვრწმუნდები, რომ 'დუმილი ოქროა" და ეპოქა პირობით შემფასებელი.



კეთილი სურვილებით
კატო ჯავახიშვილი
Back to top Go down
View user profile http://www.geowebi.com/kato/
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 19, 2009 6:22 pm

bao wrote:
Very Happy

მე კი ლექსები უნდა შემომეთავაზებინა Crying or Very sad

"რავა ყველაფერი დასწრებაზეა ამ ქალაქში" Very Happy

ბოლო ვინ არის? Rolling Eyes
ბაო, მოიტანეთ ლექსები. ბოლო არ ვიცი ვინაა, მაგრამ ჩვენ ნიჭის მიხედვითვბეჭდავთ და არა იმის მიხედვით, ვინ როდის მოიტანა. თუმცა, თუ 5 ნიჭიერი ავტორია, ამ შემთხვევაში, ბუნებრიავია, ჯერ იმის დაიბეჭდება, ვინც ადრე მოიტანა. ლაუზიეს კანონიაSmile სამწუხაროდ, თქვენი სახელი და გვარი არ ვიცი და ბაოთი მოგმართეთ
Back to top Go down
View user profile http://www.armuri.ge
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Wed Aug 19, 2009 10:06 pm

დღევანდელ დღესასწაულს გილოცავთ ყველას, ფერიცვალების მადლით უფალში დამკვიდრებას გისურვებთ!

ახლა წავიკითხე, კვლავ გაგრძელებულა მსჯელობა ბ-ნი ვანოს წერილზე. ეს ალბათ,სასიხარულოც კია, რადგან გამოჩნდა რამდენი გულშემატკივარი ჰყოლია ეროვნულ მწერლობას. ბაოს მადლიერებას ვინმე თუ დანაშაულად უთვლის,მაშინ ვიტყოდი: სამწუხარო ის არის, რომ დღეს იმგვარი ვითარებაა ჩვენს ირგვლივ, ერთმანეთს ქვეყნის, ერის, ეროვნული შემოქმედების სიყვარულისთვის, მისი დაცვისა და ქომაგობისთვის უკვე მადლობასაც კი ვეუბნებით. ალბათ, იმის შიშით, საერთო ნიჰილიზმმა ეს ადამიანიც რომ არ გამოგვტაცოს ხელიდან. თუმც ყველასთვის, უკლებლივ, საგულისხმოა, რომ ეს ისეთი "რამეების" სიყვარულია, ბ-ნი გურამ დოჩანაშვილისა არ იყოს,"დაფარვაც კი რომ სჭირდება." დავფარავდით კიდეც, მაგრამ როგორც უკვე არაერთგზის აღვნიშნეთ "ზოგჯერ თქმა სჯობს არა თქმასა".. ახლა კი ალბათ, ეს დროა.
ბ-ნ ირაკლის კი ვთვლი, რომ საერთოდ არა აქვს საქმე საღელვად. აქ ხომ დისკუსია ბ-ნი ვანოს წერილზეა,რაც სავსებით არ გულისხმობს გაზეთის რედაქტორის თვალთახედვას და მის პოზიციას. ბ-ნი ირაკლი კამათისას არც არავის უხსენებია და არც ვინმეს პასუხი მოუთხოვია მისთვის. ან კი რა არის სადავო: ლიტერატორი წერს წერილს, რედაქტორი ბეჭდავს. ვფიქრობ, რედაქტორის თავის მართლება აქ სრულებით უადგილოა. ისიც ძალზე ბუნებრივია და ეს ასეც უნდა იყოს, რომ გაზეთი, რომელსაც "ლიტერატურული" ჰქვია, ყველას უნდა ეთმობოდეს, ვისაც ლიტერატურაზე თუ ლიტერატურულად რაიმეს თქმა სურს. რა თქმა უნდა, "ნიჭიერების" გათვალისწინებითაც.
ბატონმა ირაკლიმ აღნიშნა, "ბაოს" ნამდვილი სახელი და გვარი არ ვიციო და ასე მოგმართავთო. ფორუმზე "ბაოდ" რეგისტრირებული გახლავთ თანამედროვე უნიჭიერესი შემოქმედი - მარიამ წიკლაური. დარწმუნებული ვარ იცნობთ კიდეც მის პოეზიას - სადიდო თუ არაჩვეულებრივ საბავშვო ლექსებს. ასე რომ, თუკი თქვენს გაზეთში ურიგოდაც გაუშვებთ, გარწმუნებთ, მის გამო, თავის მართლება ნამდვილად არსად მოგიწევთ.
მინდა ბ-ნო ირაკლი თქვენს გაზეთს წარმატება, ბევრი მკითხველი და ნამდვილი გულშემატკივარი ვუსურვო(რაც,ჩემზე უკეთ მოგეხსენებათ,მხოლოდ მაქებელნი არ არიან), ასევე ბ-ნ ვანოსაც, სხვათაშორის, იმ დღეს სიამოვნებით წავიკითხე მისი წერილი "მეხუთე ცდა", ბ-ნ გურამ დოჩანაშვილთან მისი რამდენიმეგზის სტუმრობის ჩანაწერები.
იმედი მაქვს, აქ, ფორუმზე ურთიერთგაზიარებული გულისტკივილი ყველას საერთო საქმისკენ და უკეთესი პერსპექტივებისკენ წარგვმართავს.
Back to top Go down
View user profile
სოსო მეშველიანი
Into Armury
Into Armury


Male
Number of posts : 100
Age : 42
Location : ესპანეთი
Registration date : 05.03.09

PostSubject: Re: მართლა სძინავს თუ არა პოეზიას?   Thu Aug 20, 2009 12:30 am

სალამი მონატრებულ მეგობრებს და გილოცავთ ფერიცვალებას. ისე დამაინტერესა ბ.ვანოს ამ წერილმა
ჩამოსვლისთანავე ვეძებე, ვეძებე და მივაგენი........მგონია არც არაფერი ისეთი საგანგაშო, რომ მეგონა. ისიც კარგი რომ ამბობს ძინავსო და არა გარდაიცვალაო. ერთმა ლიტერატორმა ამ უკანასკნელზე უარესი თქვა, როცა "კიჩად" მონათლა თანამედროვე პოეზია. მე კი ვიტყოდი ნამდვილმა ქართულმა ლექსმა, დროებით დაგვტოვა, გაგვეცალა და ისვენებს ამ ქაოსისგან მოშორებით, მუხრანთან და ოთარ ჭილაძესთან ერთად. დაველოდოთ დაბრუნდება აუცილებლად.....
Back to top Go down
View user profile http://www.litelit.ge/author_info.php?id_users=220
irakli



Male
Number of posts : 9
Age : 49
Location : tbilisi
Job/hobbies : literature
Humor : humor
Registration date : 04.08.09

PostSubject: Re: მართლა სძინავს თუ არა პოეზიას?   Thu Aug 20, 2009 6:01 am

[უცნაურები ვართ. თავის მართლება არსად მოგიწევსო... სად უნდა ან რატომ უნდა ვიმართლო თავი? არ გეწყინოთ, მაგრამ ამ უაზრო დისკუსიაში ვერ გეამხანაგებით. გაზეთი არის ყველა ნიჭიერი ადამიანისათვის. მოიტანეთ და თუ მომეწონება, დავბეჭდავ. "დავიგრუზე" და აღარ ვაპირებ ამ საიტზე შემოსვლას.
Back to top Go down
View user profile http://www.armuri.ge
bao
Into Armury
Into Armury
avatar

Female
Number of posts : 391
Age : 57
Registration date : 11.12.08

PostSubject: Re: მართლა სძინავს თუ არა პოეზიას?   Thu Aug 20, 2009 2:13 pm

მაქვს ერთი თეთრი მანდილი. ვაგდებ აქ და გავდივარ.

არ ვარ მე "უნიჭიერესი", არც შარიანი და არც "დამგრუზავი"

მაპატიეთ, რომ ერთ წერილზე გამოხმაურებამ ასეთი ცუდი ემოციები მოიტანა. ამას გულწრფელად ვამბობ:არ მეგონა,თუ ასეთ შედეგამდე მივიდოდით. კატა ლეოპოლდივით ხომ არ ვიძახო ახლა "მოდი, მეგობრულად ვიცხოვროთ-მეთქი"? Rolling Eyes

ქალბატონებთან საუბრობთ ბოლოსდაბოლოს, ლიტერატორებთან, ავტორებთან , კოკოითის სეპარატისტებთან ხომ არა?
ვახ!!!

ბატონო ირაკლი, შეიძლება თქვენ აქ მართლა აღარ შემოიხედოთ,მაგრამ მე მაინც დავწერ და იყოს აქ ეს უწყინარი ფრაზა: "ისე ნუ ვიზამთ, მძახლები რომ გავხდებით, ერთმანეთს თვალნი ვეღარ გავუსწოროთ".
რა მოხდა ბოლოსდაბოლოს?
იუმორსა და უწყინარ ხუმრობას ვეღარ ვპატიობთ ერთმანეთს?
კარგით, თუ ვინმე მობრუნდეთ აქ,ძებნა არ დაუწყოთ: გასაღები ტილოს ქვეშ დევს და ყიყლიყო ტაფაშია Very Happy
Back to top Go down
View user profile
bao
Into Armury
Into Armury
avatar

Female
Number of posts : 391
Age : 57
Registration date : 11.12.08

PostSubject: Re: მართლა სძინავს თუ არა პოეზიას?   Fri Aug 21, 2009 5:31 pm

რაღა კავკასიონზე მიჯაჭვული ამირანი და რაღა მე - ამ სარკმელში?! იმდენი ვწერე რომ პოეზიამ და კოლეგებმა კი არა, მგონი ურჩხულმაც გაიღვიძა.

ახლა ერთი სერიოზული განცხადება მინდა გავაკეთო აქ:

ამ ერთი საათის წინ დამირეკეს გაზეთ "საქართველოს რესპუბლიკიდან" და მითხრეს, რომ ჩემი ამ საიტზე დადებული გამოხმაურება ანუ პასუხი ვ.ამირხანაშვილის წერილზე "არა ჰქმნა თავისა შენისაგან ლექსი",რომელიც "ლიტერატურულ გაზეტში" გამოქვეყნდა გარკვეული ხნის წინ,
ხვალინდელ ნომერში იბეჭდებაო.
აი, შოკიც ამას ჰქვია!!!!
ძალიან გავბრაზდი და დაველაპარაკე გაზეთის პასუხისმგებელ რედაქტორს, ბატონ სპარტაკ ქობალიას და ვთხოვე ამოეღოთ ეს წერილი, რადგან მე არავინ შემთანხმებია და არც საგაზეთოდ დამიწერია მე ეს წერილი. ის კი რაც დავწერეთ, რაზეც ვიკამათეთ და კიდეც შევთანხმდით, სრულიად არ საჭიროებს ახალი "ცეცხლოვანი კერების"გაჩენას პრესაში. ბატონმა სპარტაკმა, კი უკვე გვიანია, თქვენი ჭირიმე და გაზეთი სტამბაშიაო აწყობილიო. მიუხედავად იმისა, რომ გამოხმაურებაში გამოთქმულ პოზიციას დღესაც ვიზიარებ, მაინც ძალიან გავბრაზდი და კიდევ ერთხელ, და მეათასედ ვინატრე დალაგებულ სახელმწიფოში და სამართლებრივ საზოგადოებაში ცხოვრება, რომელსაც, თუ ასე გავაგრძელებთ, ვერასოდეს ვეღირსებით, სულ რომ მათუსალას ასაკს ვეწიოთ!

თუ მე მენდომებოდა ამგვარი პასუხის დაბეჭდვა, თავადვე მივადგებოდი რედაქციას.
ახლა კი არა გამოდის?
სადისკუსიო და საკამათო თემის ასაგორებლად ავტორებს არ ვეკითხებით, ისე ვაქვეყნებთ საიტზე მოძიებულ მასალას?
თუ გაინტერესებთ ეს საკითხები, აქვე ჩართულიყავით პოლემიკაში, თქვე კაი ხალხო, რაღა მასალები მიგაქვთ დასაბეჭდად?
მე წინააღმდეგი ვარ ამისა!!! ჩვენ ვიკამათეთ და დავასრულეთ აქ, საიტზე ამ საკითხის ირგვლივ მსჯელობა და არანაირი სურვილი არ გამაჩნია, "სეირ-ფართში" გადაიზარდოს ეს საუბარი, რომელსაც ვინ რაში და რისთვის გამოიყენებს, ღმერთმა უწყის.
ვაცხადებ, რომ ეს არ არის კარგი საქციელი.

მოკლედ, ხვალინდელ გაზეთში "საქართველოს რესპუბლიკა"
დაბეჭდილი ჩემი გამოხმაურება ვანო ამირხანაშვილის წერილზე იბეჭდება ჩემთან შეუთანხმებლად და ბატონი სპარტაკ ქობალია, ვიმედოვნებ, ამას არ უარყოფს!!!
Back to top Go down
View user profile
Sopio Japaridze
Way at Armury
Way at Armury
avatar

Female
Number of posts : 36
Age : 40
Location : თბილისი
Job/hobbies : ფოლკლორისტი, საქართველოს რადიოს პროგრამების წამყვანი
Humor : საკმარი იმისთვის, ჩემი რომ ვუთხრა და სხვისი გავიგო...
Registration date : 04.08.09

PostSubject: Re: მართლა სძინავს თუ არა პოეზიას?   Sun Aug 23, 2009 3:03 pm

ძნელია გულგრილი დარჩე იმ ფაქტის მიმართ,რაც ბაოს განცხადებაშია აღწერილი. ეს ის შემთხვევაა, როცა სიტყვები არ მყოფნის, არც ხელი და არც გონება საწერად და საერთოდ, რაიმეს სათქმელად არ მემორჩილება. ამას ძალიან გულწრფელად, ყოველგვარი პოზისა და პათეტიკის გარეშე ვამბობ. ვთვლი, რომ ამ ამბავმა ყოველგვარ მოსალოდნელ მოულოდნელობას გადააჭარბა. შესაძლოა, მე მეჩვენება ასე და ქართული პრესისთვის ბანალური და აპრობირებულიც კია ამგვარი მეკობრეობა.
დაუშვებლად და წარმოუდგენლად მიმაჩნია, ავტორის უნებართვოდ მასალის ფორუმიდან ამოღება და სურვილისამებრ, რომელიმე ბეჭდვით ორგანოში განთავსება. ზნეობრივ და მორალურ საკითხებს რომ თავი ვანებოთ, ეს ხომ პირველ ყოვლისა, საავტორო უფლებების შელახვაა? არ მგონია ასეთი ქმედება დიდების შარავანდით მოსავდეს ქართული პრესის მსახურთ. ამ საკითხზე მსჯელობაც კი საჩოთირო მგონია, უბრალოდ მაინტერესებს როდის შეწყდება სკანდალებზე ნადირობის სეზონი ჩვენს ქვეყანაში, როდის ამაღლდებიან ადამიანები თავიანთ ვნებებეზე, წრფელად დაინტერესდებიან ამა თუ იმ სფეროში არსებული პრობლემით, უჭირისუფლებენ და უწამლებენ მათ და სასეიროდ არასოდეს დაეღირებიან?!


Last edited by Sopio Japaridze on Sun Aug 23, 2009 6:15 pm; edited 1 time in total
Back to top Go down
View user profile
კობა (მატეკარი)
Into Armury
Into Armury
avatar

Male
Number of posts : 209
Age : 61
Location : თბილისი
Job/hobbies : კვლევა
Humor : ვაცივით
Registration date : 19.08.09

PostSubject: Re: მართლა სძინავს თუ არა პოეზიას?   Sun Aug 23, 2009 5:29 pm

30 წლის წინ, როცა არქიტექტურის ფაკულტეტზე ვსწავლობდი, არ მიყვარდა პოლიტეკონომია და ეს პირში მივახალე ლექტორს.
მან კი მითხრა - თუ გიფიქრია რატომ იყო აღორძინების პერიოდში ამდენი გენიოსი ერთად რომ დაიბადაო. რატომ არ არიან ისინი თანაბრად გადანაწილებულნი მთელს იტალიის ისტორიაზეო.
მერე კი თავად მიპასუხა, რომ ოქრო დაგროვდა ამ დროს ბევრი და ნიჭიერი კაცისთვის ხელოვნებაში მოღვაწეობა სარფიანი შეიქმნაო.
ცოტა უტრირებულია ალბათ, მაგრამ ერთი კი მგონია ჭეშმარიტი ჩემი ლექტორის ნათქვამიდან - ერთად გენიოსები არ იბადებიან და თუ ბევრნი არიან, პირობებია შესატყვისი ალბათ თორემ არავითარი ბიოლოგიური ალბათობა ამისი არ უნდა არსებობდეს.
მე თანამედროვე პოეტების ლექსებზე ისეთი მძაფრი ემოცია გამჩენია, რომ მაპატიეთ და გოგლას და გრიშაშვილის კითხვისას არავითარი მსგავსი.
ანუ თუ დღეს ხალხი პოეზიით ისე მასობრივად არ არის დატყვევებული, ეს რა თქმა უნდა პოეტების ნიჭიერების ბრალი სულაც არ არის.


Last edited by კობა (მატეკარი) on Sun Aug 23, 2009 5:48 pm; edited 1 time in total
Back to top Go down
View user profile http://alternativa.ge
კობა (მატეკარი)
Into Armury
Into Armury
avatar

Male
Number of posts : 209
Age : 61
Location : თბილისი
Job/hobbies : კვლევა
Humor : ვაცივით
Registration date : 19.08.09

PostSubject: Re: მართლა სძინავს თუ არა პოეზიას?   Sun Aug 23, 2009 5:47 pm

გაგრძელება

ჯვარი სწერიათ და მთაწმინდის პანთეონის არაერთ ბინადარზე უკეთესი პოეტები მეგულება ჩვენს შორის, მაგრამ მართლა სხვა დროა ახლა. მე, რომელიც არანაირი პოეტის ლექსს არ გავუშვებდი წაუკითხავს ოციოდე წლის წინ, ახლა ისე შემისრუტა ინტერნეტმა, ჭამა მავიწყდება ხშირად.
გურამ ფანჯიკიძემ ბრძანა დიდი ხნის წინ ერთ შეხვედრაზე - ჩვენში მწერლობა საკმაოდ დაფასებულიაო. სულ ახალბედა კალმოსანს ათჯერ დიდი ტირაჟით ბეჭდავენ ჩვენშიო, ვიდრე სალვატორე კვაზიმოდოს თავისიანებიო.
ასე, რომ ცოტა გადმონაშთურია ბატონი ვანოს კრიტერიუმები.
ალბათ, ტკივილითაა ნაკარნახევი მისი წერილი, მაგრამ ათვლის წერტილი არ მგონია მთლად სწორი.
არც პასუხებშია ნამდვილი მიზეზის ჩხრეკა და ემოცია სჭარბობს აქაც (თუნდაც სამართლიანი). ხომ ფაქტია, რომ თქვენს მიერ ჩამოთვლილ მართლა საოცარ მოლექსეებს საზოგადოების უმეტესობა არ იცნობს და იეთიმ გურჯის თითო სტროფს კი ალბათ ყველა იტყვის.
ახლა კი "დაგრუზულობის" შესამსუბუქებლად მცირეოდენი ხუმრობა:
მიხო მოვიდა შუბლგატეხილი სახლში.
- სად ეგდეო? - მარომ
- კონსტრუქციული დიალოგი გვქონდა გამგეობაშიო.
- თავი დიალოგზე როგორ გაგიტყდაო?
- ი, აბა შენ მოგხვედროდა იმოდენა კონსტრუქციაო...
ჰოდა, იმას ვამბობდი - მთლად კონსტრუქციულად არ მეჩვენა ეს დიალოგი.
ხოლო რედაქტორს თუ ეწყინა რამე, იმაზეც დაფიქრდეს იქნებ, რომ მისმა გაზეთმა გამოიწვია ეს რეაქცია. გაზეთი ნუთუ იმას ნიშნავს, რომ ბევრი ადამიანი უსამართლოდ გაანაწყენოს? მა რედაქტორი რისთვის არის?
Back to top Go down
View user profile http://alternativa.ge
Sponsored content




PostSubject: Re: მართლა სძინავს თუ არა პოეზიას?   

Back to top Go down
 
მართლა სძინავს თუ არა პოეზიას?
View previous topic View next topic Back to top 
Page 2 of 3Go to page : Previous  1, 2, 3  Next

Permissions in this forum:You cannot reply to topics in this forum
არმური (ნისლი მთათა ზედა) :: სტუმრები და მასპინძლები :: ვეძებთ ნამდვილ ლიტერატურას - სტუმრად ”ლიტერატურულ გაზეთთან”-
Jump to: